落機有著落

hea下hea下，終於有些微進展。第一站oslo「酒店」book左，就係平通互聯網既anker hostel！多謝葉生推介。不過差唔多$270一晚都仲要住8人大房~係咪痴線。very happy即刻話好多靚仔，真樂觀。好彩位置極佳，決定一黎就住3晚hea hea佢先。

其餘進展就係不停倒水。買左相機LX3同notebook。無公司機用又買左部cheap cheap電話。同埋cheap cheap羽絨。仲差個喼未買，堅持都要買cheap cheap的。

謝啊

你從不多話，但簡單幾句，唔好出夜街，一個人小心些，還是窩心。老朋友就是這麼有趣的一回事。

木蚤理論

年都過埋，趁食飯同阿媽break the news。

聽到辭職，好自然循例問點解。我咁岩咬住舊雞，就好簡潔咁話：「唔好做。」點知兩老竟然笑，笑到好似睇緊畢打自己人咁。雖然無可否認呢句對白係有D funny，但exit interview既野，交功課姐，何必令人難為情。

跟手又問，去邊度旅行。hmm...有D野。我都未話我會去旅行。Anyway，照答啦，果然一切好順利。我覺得，係老豆通水同佢打左底。否則就係佢都覺得我過去兩年安份守己好有問題。

阿媽唔發癲一回事，當然都吟左句，人地搵份工咁難，你又走去辭職。點知老豆突然出招：「挑，佢木蚤都唔使養隻，怕咩。」頂，點解要係木蚤？笑左。

浪漫與放逐

意外地睇到一集最浪漫既叮噹。大雄發癲變走晒其他人，全世界剩返佢自己。一個人望住空蕩蕩既遊樂場，一個人睇日落，一個人聞住靜宜送俾佢既香薰想見返靜宜。

我想，我一個人既旅程都會差唔多。原意係構思一次大旅行。後黎你地定性佢為流浪。然後我發現可能係一場放逐。

很多的安慰。
「去三個月呀......唔知會識到幾多個鬼仔？」
「我地下次打邊爐會諗起你，到時打俾你，話你知D野好好食！」
「有咩幫手出聲啦。」「......」「唔通由得你餓死都唔理你咩。」

感激。我想我不是一個人。

十大噩耗之負能量大爆發

負能量值向來反覆偏高。響香港仲可以搵人玩。一個人響出面，我諗都要自己玩手指。

十大噩耗之沖涼無熱水

天寒地凍，如果係咁，我寧願唔沖。當然前提係，熱水消失既時候我仲未成身泡。呢個有難度。

辭職係我既嗜好

對於仍然會問我點解「咁激」辭職既朋友仔，大概只有呢個答案先可以滿足你地。當然仲有好多懶得問，同埋聽完淨係會「哦」然後繼續食飯既你地，咪就係懶理我又有咩籍口。

突然敲定

只係響google打左幾隻字，hong kong norway air ticket。然後就買左機票。

其實機票不嬲都係咁買。但係望住個電子confirmation，好迷，明明仲諗緊唔知成唔成行。好唔真實，封野仲要係法文！air france真係有病。去程10/3，飛oslo。回程5/6，berlin返。一個人，三個月，究竟會係點？其實，我有無錢去咁耐？？？

行程仍然待定，不過既然德國返，西伯利亞應該打左柴，雖然我前日先買左本書。睇到你既留言，「不用想，就飛吧！」點解次次都係你搞喊我。

出發啦不要問那風在哪，迎風向前是唯一的方法。今年生日，我會一個人，在地球上某個地方度過。好浪漫呀。係時候聽主題曲。