港女黎芬蘭試正宗芬蘭浴。搵左間所謂最正宗燒柴既，不過由於身在首都helsinki，所以點都唔會外面有個湖你跳落去。無計，照去。
去到門口好詭異。一個無著衫、下身圍條毛巾既白頭大叔坐響門外歎煙。入面燈光昏暗，得個好似細個睇戲賣飛既窗口仔，賣飛阿哥收錢，俾張紙飛你。隔離一條窄窄既樓梯，一樓女、二樓男。先入更衣室，有堆好難開既木locker。中間有張細枱仔，圍住坐左幾個無著衫既大嬸，肉帛相見地吹水。
我膽粗粗，問大嬸們介唔介意介紹下點搞，因為我第一次黎。佢地好似覺得好funny，其中一個好人大嬸忍唔住率先話，第一步梗係除衫。大家都進入伊甸園狀態，大嬸更加親切，拉住我巡視沖涼房，再入桑拿房。
個燒柴爐好經典，頂到出天花既大鐵鍋，裡面真係火光熊熊，隔離有大堆柴。大嬸勸我咪立亂自己加柴，但就教我調校火爐溫度，同埋直接成桶水潑落木牆。佢話咁樣感覺會更mellow，好舒服，試過又真係。
大嬸陪我坐左陣，講左好多傳統芬蘭浴知識。原來以前大家響鄉下，人人屋企都有一間咁既木屋仔，又唔知點解人人都有個湖響外面。夏天既時候，兩公婆一齊自家焗，焗慶左就出去個湖游水傾偈野餐，玩完再焗，焗完再玩，搞足大半日，好鬼爽。
所以就算而家，大嬸佢地都帶晒啤酒、白酒、腸仔、火腿，圍埋張枱仔邊食邊睇雜誌邊吹水。不過我之前唔知所以無準備，失敗！
後黎又撞到個美少女導演。佢二話不說就扭大個火爐。我開頭都慌慌地，事關我響香港其實一焗就見暈抖唔到氣。不過響呢度焗左好耐，竟然越焗越舒服。個柴爐果然名不虛傳，寧舍好feel。女導演又介紹我睇最近有套講芬蘭浴同透視芬蘭傳統、個性云云既獨立電影，俾晒地址時間我，可惜我第二日就要走，睇唔到。
綜觀短短個幾鐘頭既見聞，我發現原來真係可以好淡淡的、淡淡的粉紅，好靚架。唔知同北歐人種有無關呢。
