人格障礙第一章

一路安排行程，一路發現自己一個好嚴重既人格障礙。好聽D講叫隨遇而安，講得狠D叫隨波逐流。基本上缺乏做任何決定既能力。而每當被逼做決定，都係做錯。如果做岩，只係咁岩。

十年前已經諗過做個表，記低每年咩月份咩時間最岩去邊旅行有咩咩咩玩，咁就可以隨時有計劃無計劃起程。但諗左十年得個桔。

呢幾日曾經有個念頭，今次乜都唔plan亂咁行，下次係咪都應該試下plan定晒三個月行程跟住玩，唔知會點？其實我覺得會幾恐怖。

無可否認我覺得亂咁行好好玩，因為會撞到好多意想不到既野，因為根本無諗過會撞到乜野。但同時又會錯過好多好似唔應該錯過既野。搞左一輪就會諗早知咁咁咁。但當知道應該咁咁咁，又會覺得原來就係咁。小姐，其實你想點？

我諗，與其下次plan定三個月，不如而家開始plan定最後一個月，唔好乜都話下次。然後發現，我真係唔想。原來有時我心諗話下次，同話下次飲茶一樣，都係吹下。

越諗越迷惘，好想飲朱古力奶冷靜下，又唔想三更半夜出街買。我都唔知點解係朱古力奶，但總之突然發現樓下counter咖啡機有得賣，仲要熱既，兼抵喎。試下，OK好味，又即刻開心晒。其實我個人真係無乜要求，唔好再成日扮有要求好無？