今日被困cabin無野做，可以追寫返oslo四日行程。
~~~~~
岩岩到步，D野貴到抑鬱。30蚊港紙支汽水？60蚊個爛鬼凍包？麥當當食個餐要成舊水！咪玩啦。見到乜都唔想食。結果慳家程度係，第一日，全日只係飲左一支500ml既奶，好味！同一大包薯片既少少，結果夜晚餓到標冷汗醒左然後想暈。其實喼度有餅，但真係乜都唔想食。
不過見到周圍係雪好開心，落頭皮雪都好開心。最愛係botanic garden，好多好多雪，好靚好好玩。我諗我對雪有少少obsession。
第二日覺得要對自己好D，用七十幾蚊港紙食左個早餐，第一次坐低響舖頭食野，就係一個朱古力牛角包同一杯latte。夜晚買三文魚同面包返屋企，獎多自己一支汽水，因為個膠樽之後可以用黎裝水帶出街。
臨行唔記得check插頭，結果用左約80蚊港紙買左一隻轉插，都唔敢咁豪買兩隻，唯有就住用。
oslo既朝早係令人好迷惘既地方，唔知點解總有呢種感覺，定只係唔慣？唔慣乜都靠自己，唔慣成街紅鬚綠眼。Shit，i'm so outta place！第一日我個心的確屌晒鬼。
某個仍然好迷惘既朝早，響便利店買野咁岩聽到收音機播hey there delilah，覺得好warm，開心晒。
某個好迷惘既下晝，遇到一個好教父爛仔style既大叔，響街邊用手風琴拉教父主題曲。
挪威其中一個令人迷惘既地方，係明明你兜口兜面企響度，但佢會叫返你上網睇資料同做booking。咁我黎呢度做乜？乜都要跟住做，好，悶，呀你地。
行博物館最中意munch museum。免入場費都豪左三十幾蚊港紙租個audioguide。我覺得呢幾年去旅行都去岩地方。由最經典既意大利，到西班牙、法國，到而家黎北歐睇新野。
National Gallery都係好地方，有高更、cezanne等等一堆佢識我我唔識佢既大作。無論用幾鮮既色，都走唔甩陰陰沉沉。北歐果然係令人想自殺既地方。另外都睇左D新既裝置藝術類，幾creative睇得幾開心，不過睇得多會悶。
去埋維京船博物館，無乜特別，幾隻大船羅。其實本黎係為左搭隻渡海輪先去，點知冬天唔開，得返架爛鬼貴爆遊客船。梗係唔坐，但又覺得無理由去唔到，於是試下自己搵巴士去。都係任性。不過博物館所在個區好靚，小區風味，亦係我響呢度初遇頭皮雪既地方。
唔想咁city，去左日滑雪場。唔知去黎做乜，又唔識滑雪。不過咁近city既滑雪場好似好funny咁。又諗住去到就搵到教練。不過諗諗下，平時去泳池都無游水教練，點解滑雪場會有滑雪教練？但係就意外搭上荷蘭妹，陪我玩白痴雪橇。我仲白痴到俾架雪橇sir左去，追到氣咳。
我諗真係物以類聚，荷蘭妹有樣野同我好似，就係亂咁行。每次滑完雪橇都要好似滑雪咁上返去再滑落黎。某次我地又原路返返上去，佢突然呆左，問我地去左邊。原來佢掛住講野，只係見路就行。佢個下個樣真係好驚，驚到我都嚇親。而家我明平時俾我唔認路嚇親既朋友係咩心情。
玩完還野，租雪橇佬係佢同鄉，好好客咁請我地飲熱朱古力。佢地用鄉下話傾左餐，我聽得好認真，聽到一兩隻字。之後陪荷蘭妹去食齋，係我唯一一餐坐低食既午/晚飯，可能一個人真係無乜興趣坐低食野。呢餐都係我黎左三日第一餐真係飽，做窮人真係淒涼。
我地又一齊行行左陣類似十蚊店既野，佢好sweet買左手信俾老豆老母。又行書局，再去個個出名好多雕塑既公園vigelandsparken，睇到好靚既日落，但D雕塑我同荷蘭妹都唔識欣賞，一致認為so weird。其實有人陪都幾好，不過一個人又有一個人好，做人都係唔好太貪心。
搭電車見到有人無買飛俾臥地捉到，好好笑。
響lokka行舖頭仔，見到好多好有心思既display，當然無得影相。然後發現，原來好多野都係留唔低。或者過一陣連自己都唔記得，可以做既只有好好享受呢刻既好心情。咁岩撞到街邊檔類似冬甩物體，有熱野食，響呢度係好感動的事啊。
最失敗係去opera house，唔敢上佢個斜頂。D雪好滑呀。荷蘭妹都笑過我對鞋九唔搭八。的確又好跣腳，不過其實又唔會咁易跌低。做人如是。
黎左幾日都唔認得路。明明以為行緊大直路，行下行下點知好眼熟返返起點。後黎一次問路，成半個鐘頭既路程，個local靚姐只係同我講「up up up」，我竟然順利到步。原來問題唔係左同右，而係上同落。有時諗野唔好諗埋一邊。正如，唔好質疑點解明明響hostel住一樓，上左一層樓梯，但入到房望出窗口，又係地下個層。
四晚都住八人房，最大鑊係廁所唔係響出面，係房入面。keep住成屋人，我真係好難痾屎。咁私人既野，我唔可以響覺得有人既地方做架，唉。仲有黎左只係幾日，D頭髮開始扮鬼妹痴埋一舊，唔知點解去親歐洲都係咁。某日又因為成屋人，我咩都做唔到唯有恰一恰，戴住con，結果右眼幾乎剝唔到，嚇到我呢幾日都無戴con。
D人車輪轉，最cutie始終係一班意大利鬼，問我乜香港唔係響日本？最討厭醉酒澳洲佬。不過另一對澳洲couple就好nice。同有個好文藝既俄羅斯妹。
~~~~~
終於追返，而家要準備出門口玩雪橇狗。頭先先發現漏左玩釣魚，都怪自己貪hea。hea左響度又諗，如果有車牌就可以租車出去兜下風，咁先盡興嘛。我想睇海邊呀，經過見好靚咁。好喇hea又嫌hea，忙又嫌忙，究竟我想點？
-挪威時間16.08 16.03.2010, day 7
沒有留言:
發佈留言