$ matters

去旅行要有錢，但更加重要既問題，係點樣攞到你既錢，同埋找卡數。結果，我為左呢個問題去足一個禮拜銀行咁滯。

原意係咁既，要袋晒全程旅費響身當然無可能，我唔想日日提心吊膽，個人又無手尾，唔見左我肯定爆喊搵條最近既橋求其推條茂利落河以洩心頭之憤。於是唯有靠ATM。全球兩大提款network當然係plus同cirrus，返大陸要用銀聯另計。plus卡幾乎人人都有，呢個無問題。但係響香港要攞張cirrus原來難過登天。

最初睇中citibank，因為最近我屋企。打電話問左先，好快有人聽，操流利廣東話既親切少女非常impressive，不禁心裡暗讚好過hsbc個個等到自動cut線既廢爆hotline多多聲。電話問完去到counter又再問，出卡姐姐又問，問勻全世界，都話有cirrus。Good啦。哈，點知張卡出到黎，反轉一睇，無喎！咁得意既。

好啦雖然我已經有plus卡，不過見佢張卡用4位password，都攞得過，因為外國ATM通常都4位。越似佢地local卡，出事機會越低。但於是又原地踏步，再搵邊樹有cirrus。

終於幾經考證渣打真係有喎，咪又去攞。講到呢度我都無氣，總之好明顯大家都估到，張卡到手，又係無羅。問左一大輪，哦原來係咁既，有係有，但要特別request。更特別係唔止我要特別講明，係佢地幫我做個陣都要特別做，而響我張卡出事前，佢地無人知架！前後拖左3日，就同我講要4個working day。但係今日星期五喇播。

「下？點解？」「咁有無得快D？」「唔係喎，我咁咁咁喎。」「我明，但係咁咁咁喎。」「唔係喎，如果咁咁咁又得唔得？」「點解唔可以快D？」「有無辦法快D？」「真係無得快D？」「我咁咁咁都得喎，會唔會快D？」「不如你試下咁咁咁，睇下會唔會快D？」

估唔到響sv浸淫兩年，今日終於學以致用。俾人煩得多，煩人有一手。我如是者不停重覆以上問題同埋提出各種疑幻似真既建議，佢地終於話有辦法搞到我星期二臨行前有得攞。嘩，講真，我都覺得自己好煩，唯有係咁講唔該。雖然我唔覺得責任在我方，但我真係覺得自己好很煩。

提款搞掂，找數相對簡單，不外乎set返全部online banking同online pps，都係騰黎騰去同click黎click去。不過東亞都有單笑料，就係話我online account太耐無log，reset password要一個禮拜先寄到黎屋企。咁我梗係又問，有無得快D，反建議不如取消呢個online account開過個新。唔好以為呢個建議好無稽，佢話係得架，仲可以即刻set埋password。不過佢同時提出一個非比尋常既要求：「小姐，你有無住址證明響度？」「下？我一路用緊你銀行架播。」「係呀，我呢度都見到你信用卡月結單record，不過我地print唔到，saving先print到，所以你要俾住址證明。」「哦......」

總結一下，講左咁耐，其實我只係搞左以下少少野：
- 2張提款卡，一張plus、一張cirrus，確保響大部份提款機都攞到錢。
- 2張credit card既online banking，一張master、一張visa，確保簽完卡check到幾時要找幾多數。
- pps online account，用黎找以上2張credit card既數。

都未計唱錢。好彩大佬娶左個醒老婆，好簡單就幫我唱到第一程既挪威錢。另外自己有以前用剩既幾廿蚊歐羅責袋。響香港自己地頭咁小事都搞到一頭煙，究竟響出邊3個月，會搞幾多事出黎？期待。