我真係見到北極光

挪威時間夜晚十點鬆D，寫完上一篇，msn吹完水，刷完牙，熄燈。岩岩黑晒，個心仲淆淆地，因為不嬲怕黑。突然一陣綠色響窗口揚過。睬，唔係咁邪呀。

中埋個窗口睇，真架。綠色，係咁湧埋黎，好似鬼片咁，驚到個心寒一寒打冷震。唔理咁多，好彩外套頸巾同帽全部丟埋一堆，拿起手邊著邊衝出街。真係好靚。靚得黎又好恐怖。響個天揚下揚下好似想湧埋你度咁。揚左陣另一邊山頭又好似成個著燈發晒光。我睇到唔敢郁，驚一郁佢就會無晒。

過左分零兩分鐘，好似無乜。衝返入屋試下攞相機影唔影到。再出返黎又熱鬧返。對手超震咁影左三張咁大把鬆郁濛版已經頂唔蒲，但點都唔捨得走。

個下我心諗，god does love me... what has He ever taken from me to let me see this? or what would he like to take? 然後就喊左出黎。

全程我諗無十分鐘，都好，真係頂唔住。入屋個陣已經成個人好似響雪櫃攞出黎既玻璃樽咁，冰晒。大佬我本黎只係著短袖tee同撻拖鞋，鞋都換唔切，係攞相機個陣著多對襪咁大把，好彩唔係著短褲。不過就搞到條長褲拖地俾雪整濕褲腳。

之後唔死心，著返晒暖衫出去等多陣，已經無lu。究竟我睇到個陣係已經揚左好耐定岩岩開始真係一個謎。雖然唔係最靚彩色個隻，但已經好滿足。雖然凍到而家個頭好痛，要食個意粉暖一暖。其實咁既天氣，著晒成喼衫都唔係好頂得住。難怪睇既途中，有個疑似local響隔離屋出黎，佢望都懶望唔知攞野定搞咩轉頭搞掂就衝返入屋。

此行其中一個口號就係to see sth that stuns me。兩個鐘頭前仲諗緊報唔報個D掠水等北極光團，估唔到第一晚就睇到。咁我係咪隨時可以返黎？嘻嘻。





-挪威時間 00.30 15.03.2010, day 5-6