hea @ groningen, the netherlands

因為覺得8蚊歐羅食十件魚生好抵，無意中就識左壽司店個女仔，然後又識左佢幾個朋友同朋友既朋友，繼而無啦啦就唔駛錢寄居左響人地屋企。

於是，好hea。好無壓力咁hea。今日活動係出街食早餐，同買餸煮飯。原本想煲個青紅蘿蔔湯潤潤佢，但賣菜鬼佬未見過青蘿蔔，仲嘲笑我。於是改煲蕃茄薯仔。岩岩煲好，都幾好味！仲會有炆雞翼。

尋日屋主帶我去教堂彈organ，第一次見到晒裡面同知道點運作，仲彈左陣，好好玩呀。

屋主又講左D小城故事。例如廣場呢邊全新，對面全舊，因為二戰個陣美軍響對面，射爛晒呢邊。原來最大破壞力始終係美國佬。

基本上呢幾日都係同屋主或壽司女hea。方法就係坐cafe同飲野。最搞笑係佢地真係寧願慳埋食野錢愛黎飲野。飲酒又好飲咖啡又好。無端端識左D local人，件事就唔同晒。至少我而家有得抖下。hea多陣又會再次動身。