denmark high tea

慳埋慳埋，早幾日響copenhagen終於有錢扮上等人，去左號稱最老牌最好味既餅舖la glace食high tea！當然仍然爛身爛世。

先去counter點野食俾埋錢，佢就會攞去你個位。早幾日都黎買過件pastry take away，又的確係好味，街邊cheap貨無得比。今云上次個型爆紋身阿嬋唔響度，換左sweet sweet後生靚女，我問佢邊款最好食，佢介紹朱古力蛋糕，信佢，再加杯熱朱古力。點知一到俾錢，個心打個突，個樣梗係扮無野，不過都忍唔住瞄左靚女一眼，你介紹個cake唔好食就呻笨。

 好彩一D都無失望。坦白講，朱古力應該唔係十分超靚個隻，但成件cake味道精緻，我估加左少少咁大把杏仁香吊味。我平時唔多食杏味，但佢就恰到好處似有還無，成件事decent晒。面個一塊仔朱古力，就似加左少少榛子味，成件事係咪好delicate先！一路食一路自己偷笑。

至於杯朱古力，直頭不得了。本身已經夠濃夠滑，面個層衣係厚架，直頭有牛油feel。唔單止咁，佢仲另外上多杯cream。個cream就咁試味唔特別，直頭唔算香。但偏偏一攪左落個朱古力度，wow，成杯野多埋層泡滑溜到呢。容許我用一個好港女既形容，好飲過半島個杯羅。再好港女咁補多句，不過論材料半島D朱古力應該靚D。

講返間野，布局又真係幾classic。最搞笑我前面坐左三個阿嬋，十足我地平時響香港幾件中女去high tea咁，一人嗌件cake然後係咁叉人地個舊黎食，試晒味個死人樣好好笑。原來我平時都幾可愛。食食下又攞岩岩shopping買左既衫出黎玩，噢，我覺得好warm。

另一枱又黎左兩個講英文既女人遊客。同我一樣，入到黎第一件事又係問侍應應該坐低先定嗌野先。同埋俾完錢第一個反應都係，好貴！

後尾佢地件cake食左大半先見到裡面有條「毛髮」......well，我諗係頭髮黎既。攞去counter，個似話得事既老女人竟然俾返廿幾蚊佢，大概就係個cake未食個忽既價錢。都幾mean。唔知丹麥有無食環署。個兩個女人當然無奈，我諗唔係錢既問題，而係，咁即係點。不過丹麥人咁得意，可能佢地真係覺得無乜野兼合情合理合法。

丹麥時間2010.03.27 18.34 day18 = day4@Copenhagen

*由於太開心，食完即日就寫定。不過個陣上唔到網...... =.=